“TBC Kredit” BOKT-nin mənfəəti 18 dəfə azalıb

Gürcüstan bankının Azərbaycandakı törəməsi “TBC Kredit” BOKT 2024-cü ili 71 min manat xalis mənfəətlə başa vurub. Bu göstərici əvvəlki ildəki 1 milyon 265 min manatlıq mənfəətlə müqayisədə 18 dəfə azalma deməkdir.

banks.az xəbər verir ki, bu barədə BOKT-nin illik audit hesabatında qeyd edilib.

İlin sonunda BOKT-un faiz gəlirləri 5 milyon manatı keçsə də, əməliyyat xərcləri və ehtiyat ayırmaları nəticəsində vergidən əvvəlki mənfəət cəmi 225 min manat olub.

Ən böyük xərc xərci 2,5 milyon manatla işçi heyəti ilə bağlı xərclər olub.

Aktivlər isə kəskin şəkildə 20,5 milyon manatdan 13,9 milyon manata düşüb. Bu azalma əsasən kredit portfelindəki 5 milyona yaxın azalma və pul vəsaitlərindəki ciddi geriləmə ilə əlaqəlidir. 2023-cü ildə müştərilərə verilmiş kreditlər 14,2 milyon manat olduğu halda, 2024-cü ilin sonunda bu göstərici 9,2 milyon manata enib.

BOKT-un öhdəlikləri 8,8 milyon manatdan 2 milyon manata düşsə də, kapitalda ciddi dəyişiklik olmayıb – 11,8 milyon manat səviyyəsində qalıb.

BOKT keçən il filial sayını 4-dən birə endirib.